ט וַֽיִּתְּנ֗וּ מִמַּטֵּה֙ בְּנֵ֣י יְהוּדָ֔ה וּמִמַּטֵּ֖ה בְּנֵ֣י שִׁמְע֑וֹן אֵ֚ת הֶֽעָרִ֣ים הָאֵ֔לֶּה אֲשֶׁר־יִקְרָ֥א אֶתְהֶ֖ן בְּשֵֽׁם: י וַֽיְהִי֙ לִבְנֵ֣י אַֽהֲרֹ֔ן מִמִּשְׁפְּח֥וֹת הַקְּהָתִ֖י מִבְּנֵ֣י לֵוִ֑י כִּ֥י לָהֶ֛ם הָיָ֥ה הַגּוֹרָ֖ל רִֽאישֹׁנָֽה׃ יא וַיִּתְּנ֨וּ לָהֶ֜ם אֶת־קִרְיַת֩ אַרְבַּ֨ע אֲבִ֧י הָֽעֲנ֛וֹק הִ֥יא חֶבְר֖וֹן בְּהַ֣ר יְהוּדָ֑ה וְאֶת־מִגְרָשֶׁ֖הָ סְבִֽיבֹתֶֽיהָ׃ יב וְאֶת־שְׂדֵ֥ה הָעִ֖יר וְאֶת־חֲצֵרֶ֑יהָ נָ֥תְנ֛וּ לְכָלֵ֥ב בֶּן־יְפֻנֶּ֖ה בַּֽאֲחֻזָּתֽוֹ׃ יג וְלִבְנֵ֣י ׀ אַֽהֲרֹ֣ן הַכֹּהֵ֗ן נָֽתְנוּ֙ אֶת־עִיר֙ מִקְלַ֣ט הָֽרֹצֵ֔חַ אֶת־חֶבְר֖וֹן וְאֶת־מִגְרָשֶׁ֑הָ וְאֶת־לִבְנָ֖ה וְאֶת־מִגְרָשֶֽׁהָ׃ יד וְאֶת־יַתִּר֙ וְאֶת־מִגְרָשֶׁ֔הָ וְאֶֽת־אֶשְׁתְּמֹ֖עַ וְאֶת־מִגְרָשֶֽׁהָ׃ טו וְאֶת־חֹלֹן֙ וְאֶת־מִגְרָשֶׁ֔הָ וְאֶת־דְּבִ֖ר וְאֶת־מִגְרָשֶֽׁהָ׃ טז וְאֶת־עַ֣יִן וְאֶת־מִגְרָשֶׁ֗הָ וְאֶת־יֻטָּה֙ וְאֶת־מִגְרָשֶׁ֔הָ אֶת־בֵּ֥ית שֶׁ֖מֶשׁ וְאֶת־מִגְרָשֶׁ֑הָ עָרִ֣ים תֵּ֔שַׁע מֵאֵ֕ת שְׁנֵ֖י הַשְּׁבָטִ֥ים הָאֵֽלֶּה׃ יז וּמִמַּטֵּ֣ה בִנְיָמִ֔ין אֶת־גִּבְע֖וֹן וְאֶת־מִגְרָשֶׁ֑הָ אֶת־גֶּ֖בַע וְאֶת־מִגְרָשֶֽׁהָ׃ יח אֶת־עֲנָתוֹת֙ וְאֶת־מִגְרָשֶׁ֔הָ וְאֶת־עַלְמ֖וֹן וְאֶת־מִגְרָשֶׁ֑הָ עָרִ֖ים אַרְבַּֽע׃ יט כָּל־עָרֵ֥י בְנֵֽי־אַהֲרֹ֖ן הַכֹּֽהֲנִ֑ים שְׁלֹשׁ־עֶשְׂרֵ֥ה עָרִ֖ים וּמִגְרְשֵׁיהֶֽן׃ כ וּלְמִשְׁפְּח֤וֹת בְּנֵֽי־קְהָת֙ הַלְוִיִּ֔ם הַנּֽוֹתָרִ֖ים מִבְּנֵ֣י קְהָ֑ת וַֽיְהִי֙ עָרֵ֣י גֽוֹרָלָ֔ם מִמַּטֵּ֖ה אֶפְרָֽיִם׃ כא וַיִּתְּנ֨וּ לָהֶ֜ם אֶת־עִ֨יר מִקְלַ֧ט הָֽרֹצֵ֛חַ אֶת־שְׁכֶ֥ם וְאֶת־מִגְרָשֶׁ֖הָ בְּהַ֣ר אֶפְרָ֑יִם וְאֶת־גֶּ֖זֶר וְאֶת־מִגְרָשֶֽׁהָ׃ כב וְאֶת־קִבְצַ֨יִם֙ וְאֶת־מִגְרָשֶׁ֔הָ וְאֶת־בֵּ֥ית חוֹרֹ֖ן וְאֶת־מִגְרָשֶׁ֑הָ עָרִ֖ים אַרְבַּֽע׃ כג וּמִ֨מַּטֵּה־דָ֔ן אֶֽת־אֶלְתְּקֵ֖א וְאֶת־מִגְרָשֶׁ֑הָ אֶֽת־גִּבְּת֖וֹן וְאֶת־מִגְרָשֶֽׁהָ׃ כד אֶת־אַיָּלוֹן֙ וְאֶת־מִגְרָשֶׁ֔הָ אֶת־גַּת־רִמּ֖וֹן וְאֶת־מִגְרָשֶׁ֑הָ עָרִ֖ים אַרְבַּֽע׃ כה וּמִֽמַּחֲצִית֙ מַטֵּ֣ה מְנַשֶּׁ֔ה אֶת־תַּעְנַךְ֙ וְאֶת־מִגְרָשֶׁ֔הָ וְאֶת־גַּ֥ת רִמּ֖וֹן וְאֶת־מִגְרָשֶׁ֑הָ עָרִ֖ים שְׁתָּֽיִם׃ כו כָּל־עָרִ֥ים עֶ֖שֶׂר וּמִגְרְשֵׁיהֶ֑ן לְמִשְׁפְּח֥וֹת בְּנֵֽי־קְהָ֖ת הַנּֽוֹתָרִֽים׃
֍ ֍ ֍
(ט) לאחר שעלה בגורל התחום הכללי של כל משפחה ממשפחות הלויים, חילקו את הערים לפי חשבון האוכלוסין, וַיִּתְּנוּ מִמַּטֵּה בְּנֵי יְהוּדָה וּמִמַּטֵּה בְּנֵי שִׁמְעוֹן אֵת הֶעָרִים הָאֵלֶּה אֲשֶׁר יִקְרָא אֶתְהֶן בְּשֵׁם:
(י) וַיְהִי – וניתנו ערים אלו לִבְנֵי אַהֲרֹן מִמִּשְׁפְּחוֹת הַקְּהָתִי מִבְּנֵי לֵוִי, כִּי לָהֶם הָיָה הַגּוֹרָל רִיאשֹׁנָה׃ (יא) וַיִּתְּנוּ לָהֶם אֶת קִרְיַת אַרְבַּע, אֲבִי הָעֲנוֹק, הִיא חֶבְרוֹן, בְּהַר יְהוּדָה, וְאֶת מִגְרָשֶׁהָ סְבִיבֹתֶיהָ׃
(יב) ומבאר הכתוב מדוע נטלו משבט יהודה ושמעון תשע ערים, ואילו משאר השבטים נטלו רק שמונה ערים מכל שני שבטים, וְאֶת שְׂדֵה הָעִיר, וְאֶת חֲצֵרֶיהָ, נָתְנוּ לְכָלֵב בֶּן יְפֻנֶּה בַּאֲחֻזָּתוֹ, וכיון שהיה חלקו גדול כל כך, הוצרך לתת מתחומו לבד עיר שלימה ללוויים.
(יג) וְלִבְנֵי אַהֲרֹן הַכֹּהֵן נָתְנוּ אֶת עִיר מִקְלַט הָרֹצֵחַ, אֶת חֶבְרוֹן וְאֶת מִגְרָשֶׁהָ, מנחלתו של כלב, וְאֶת לִבְנָה וְאֶת מִגְרָשֶׁהָ׃ (יד) וְאֶת יַתִּר וְאֶת מִגְרָשֶׁהָ, וְאֶת אֶשְׁתְּמֹעַ וְאֶת מִגְרָשֶׁהָ׃ (טו) וְאֶת חֹלֹן וְאֶת מִגְרָשֶׁהָ, וְאֶת דְּבִר וְאֶת מִגְרָשֶׁהָ׃ (טז) וְאֶת עַיִן וְאֶת מִגְרָשֶׁהָ, וְאֶת יֻטָּה וְאֶת מִגְרָשֶׁהָ, אֶת בֵּית שֶׁמֶשׁ וְאֶת מִגְרָשֶׁהָ, הרי אלו עָרִים תֵּשַׁע, מֵאֵת שְׁנֵי הַשְּׁבָטִים הָאֵלֶּה, שהם יהודה ושמעון.
(יז) וּמִמַּטֵּה בִנְיָמִין נתנו לכהנים אֶת גִּבְעוֹן וְאֶת מִגְרָשֶׁהָ, אֶת גֶּבַע וְאֶת מִגְרָשֶׁהָ׃ (יח) אֶת עֲנָתוֹת וְאֶת מִגְרָשֶׁהָ, וְאֶת עַלְמוֹן וְאֶת מִגְרָשֶׁהָ, עָרִים אַרְבַּע׃ (יט) כָּל עָרֵי בְנֵי אַהֲרֹן הַכֹּהֲנִים, שקיבלו ממטות יהודה, שמעון ובנימין, שְׁלֹשׁ עֶשְׂרֵה עָרִים וּמִגְרְשֵׁיהֶן׃ (כ) וּלְמִשְׁפְּחוֹת בְּנֵי קְהָת הַלְוִיִּם, הַנּוֹתָרִים מִבְּנֵי קְהָת [מלבד בני אהרן הכהן], וַיְהִי עָרֵי גוֹרָלָם מִמַּטֵּה אֶפְרָיִם׃ (כא) וַיִּתְּנוּ לָהֶם אֶת עִיר מִקְלַט הָרֹצֵחַ, אֶת שְׁכֶם וְאֶת מִגְרָשֶׁהָ בְּהַר אֶפְרָיִם, וְאֶת גֶּזֶר וְאֶת מִגְרָשֶׁהָ׃ (כב) וְאֶת קִבְצַיִם וְאֶת מִגְרָשֶׁהָ, וְאֶת בֵּית חוֹרֹן וְאֶת מִגְרָשֶׁהָ, עָרִים אַרְבַּע׃
(כג) וּמִמַּטֵּה דָן נתנו לבני קהת הלוויים אֶת אֶלְתְּקֵא וְאֶת מִגְרָשֶׁהָ, אֶת גִּבְּתוֹן וְאֶת מִגְרָשֶׁהָ׃ (כד) אֶת אַיָּלוֹן וְאֶת מִגְרָשֶׁהָ, אֶת גַּת רִמּוֹן וְאֶת מִגְרָשֶׁהָ, עָרִים אַרְבַּע׃
(כה) וּמִמַּחֲצִית מַטֵּה מְנַשֶּׁה אשר בארץ ישראל, נתנו אֶת תַּעְנַךְ וְאֶת מִגְרָשֶׁהָ, וְאֶת גַּת רִמּוֹן וְאֶת מִגְרָשֶׁהָ, עָרִים שְׁתָּיִם׃
(כו) כָּל העָרִים עֶשֶׂר וּמִגְרְשֵׁיהֶן, לְמִשְׁפְּחוֹת בְּנֵי קְהָת הַנּוֹתָרִים׃
