ו כִּֽי־כֹ֣ה ׀ אָמַ֣ר יְהוָ֗ה עַל־בֵּית֙ מֶ֣לֶךְ יְהוּדָ֔ה גִּלְעָ֥ד אַתָּ֛ה לִ֖י רֹ֣אשׁ הַלְּבָנ֑וֹן אִם־לֹ֤א אֲשִֽׁיתְךָ֙ מִדְבָּ֔ר עָרִ֖ים לֹ֥א נוֹשָֽׁבוּ׃ ז וְקִדַּשְׁתִּ֥י עָלֶ֛יךָ מַשְׁחִתִ֖ים אִ֣ישׁ וְכֵלָ֑יו וְכָֽרְתוּ֙ מִבְחַ֣ר אֲרָזֶ֔יךָ וְהִפִּ֖ילוּ עַל־הָאֵֽשׁ׃ ח וְעָֽבְרוּ֙ גּוֹיִ֣ם רַבִּ֔ים עַ֖ל הָעִ֣יר הַזֹּ֑את וְאָֽמְרוּ֙ אִ֣ישׁ אֶל־רֵעֵ֔הוּ עַל־מֶ֨ה עָשָׂ֤ה יְהוָה֙ כָּ֔כָה לָעִ֥יר הַגְּדוֹלָ֖ה הַזֹּֽאת׃ ט וְאָ֣מְר֔וּ עַ֚ל אֲשֶׁ֣ר עָֽזְב֔וּ אֶת־בְּרִ֥ית יְהוָ֖ה אֱלֹֽהֵיהֶ֑ם וַיִּֽשְׁתַּחֲו֛וּ לֵֽאלֹהִ֥ים אֲחֵרִ֖ים וַיַּֽעַבְדֽוּם׃
֍֍֍
(ו) כִּי כֹה אָמַר ה' עַל בֵּית מֶלֶךְ יְהוּדָה, גִּלְעָד אַתָּה לִי – גם אם תהיה אצלי כמו הגלעד, שהיא ארץ מושב וחמדה, וגם אם תהיה כרֹאשׁ הַלְּבָנוֹן המלא עצי ארזים, וכך תהיה מלא בבני אדם, אִם לֹא אֲשִׁיתְךָ מִדְבָּר, היפך ארת הגלעד, עָרִים לֹא נוֹשָׁבוּ, היפך הלבנון.
(ז) וְקִדַּשְׁתִּי (-ואזמן) עָלֶיךָ מַשְׁחִתִים, אִישׁ וְכֵלָיו, וְכָרְתוּ מִבְחַר אֲרָזֶיךָ, שהם המשל לשרים והגיבורים, וְהִפִּילוּ עַל הָאֵשׁ.
(ח) והגם שתהיה כמדבר, וְעָבְרוּ גּוֹיִם רַבִּים עַל הָעִיר הַזֹּאת, לראות ולהשתומם על חורבנה, וְאָמְרוּ אִישׁ אֶל רֵעֵהוּ, עַל מֶה עָשָׂה ה' כָּכָה לָעִיר הַגְּדוֹלָה הַזֹּאת.
(ט) וְאָמְרוּ, עַל אֲשֶׁר עָזְבוּ אֶת בְּרִית ה' אֱלֹהֵיהֶם, וַיִּשְׁתַּחֲווּ לֵאלֹהִים אֲחֵרִים וַיַּעַבְדוּם.
