שיעור 177, ספר דברי הימים ב, פרק יז, יב-יט

יב וַיְהִ֧י יְהֽוֹשָׁפָ֛ט הֹלֵ֥ךְ וְגָדֵ֖ל עַד־לְמָ֑עְלָה וַיִּ֧בֶן בִּֽיהוּדָ֛ה בִּירָֽנִיּ֖וֹת וְעָרֵ֥י מִסְכְּנֽוֹת׃ יג וּמְלָאכָ֥ה רַבָּ֛ה הָ֥יָה ל֖וֹ בְּעָרֵ֣י יְהוּדָ֑ה וְאַנְשֵׁ֧י מִלְחָמָ֛ה גִּבּ֥וֹרֵי חַ֖יִל בִּירֽוּשָׁלִָֽם׃ יד וְאֵ֥לֶּה פְקֻדָּתָ֖ם לְבֵ֣ית אֲבֽוֹתֵיהֶ֑ם לִֽיהוּדָה֙ שָׂרֵ֣י אֲלָפִ֔ים עַדְנָ֣ה הַשָּׂ֔ר וְעִמּוֹ֙ גִּבּ֣וֹרֵי חַ֔יִל שְׁלֹ֥שׁ מֵא֖וֹת אָֽלֶף׃ טו וְעַל־יָד֖וֹ יְהֽוֹחָנָ֣ן הַשָּׂ֑ר וְעִמּ֕וֹ מָאתַ֥יִם וּשְׁמוֹנִ֖ים אָֽלֶף׃ טז וְעַל־יָדוֹ֙ עֲמַסְיָ֣ה בֶן־זִכְרִ֔י הַמִּתְנַדֵּ֖ב לַֽיהוָ֑ה וְעִמּ֛וֹ מָאתַ֥יִם אֶ֖לֶף גִּבּ֥וֹר חָֽיִל׃ יז וּמִ֨ן־בִּנְיָמִ֔ן גִּבּ֥וֹר חַ֖יִל אֶלְיָדָ֑ע וְעִמּ֛וֹ נֹֽשְׁקֵי־קֶ֥שֶׁת וּמָגֵ֖ן מָאתַ֥יִם אָֽלֶף׃ יח וְעַל־יָד֖וֹ יְהֽוֹזָבָ֑ד וְעִמּ֛וֹ מֵאָֽה־וּשְׁמוֹנִ֥ים אֶ֖לֶף חֲלוּצֵ֥י צָבָֽא׃ יט אֵ֖לֶּה הַמְשָֽׁרְתִ֣ים אֶת־הַמֶּ֑לֶךְ מִלְּבַ֞ד אֲשֶׁר־נָתַ֥ן הַמֶּ֛לֶךְ בְּעָרֵ֥י הַמִּבְצָ֖ר בְּכָל־יְהוּדָֽה׃

֍              ֍              ֍

(יב) וַיְהִי יְהוֹשָׁפָט הֹלֵךְ וְגָדֵל עַד לְמָעְלָה, וַיִּבֶן בִּיהוּדָה בִּירָנִיּוֹת – מגדלים גדולים, וְעָרֵי מִסְכְּנוֹת – ערי אוצרות.

(יג) וּמְלָאכָה רַבָּה הָיָה לוֹ בְּעָרֵי יְהוּדָה, וְאַנְשֵׁי מִלְחָמָה גִּבּוֹרֵי חַיִל בִּירוּשָׁלִָם.

(יד) וְאֵלֶּה פְקֻדָּתָם לְבֵית אֲבוֹתֵיהֶם, לִיהוּדָה, שָׂרֵי אֲלָפִים, עַדְנָה הַשָּׂר, וְעִמּוֹ גִּבּוֹרֵי חַיִל שְׁלֹשׁ מֵאוֹת אָלֶף.

(טו) וְעַל יָדוֹ יְהוֹחָנָן הַשָּׂר, וְעִמּוֹ מָאתַיִם וּשְׁמוֹנִים אָלֶף.

(טז) וְעַל יָדוֹ עֲמַסְיָה בֶן זִכְרִי, הַמִּתְנַדֵּב לַיהוָה – דרכו היתה להתנדב נדברות מרובות לאוצרות בית ה', וְעִמּוֹ מָאתַיִם אֶלֶף גִּבּוֹר חָיִל.

(יז) וּמִן בִּנְיָמִן גִּבּוֹר חַיִל, אֶלְיָדָע, וְעִמּוֹ נֹשְׁקֵי [-חמושים ב]קֶשֶׁת וּמָגֵן מָאתַיִם אָלֶף.

(יח) וְעַל יָדוֹ יְהוֹזָבָד, וְעִמּוֹ מֵאָה וּשְׁמוֹנִים אֶלֶף חֲלוּצֵי צָבָא.

(יט) אֵלֶּה הַמְשָׁרְתִים אֶת הַמֶּלֶךְ, שהיו עמו תמיד בירושלים, מִלְּבַד אֲשֶׁר נָתַן הַמֶּלֶךְ בְּעָרֵי הַמִּבְצָר בְּכָל יְהוּדָה.