כא אָ֧ז יֵֽחָלֵ֛ק הָעָ֥ם יִשְׂרָאֵ֖ל לַחֵ֑צִי חֲצִ֨י הָעָ֜ם הָ֠יָה אַֽחֲרֵ֨י תִבְנִ֤י בֶן־גִּינַת֙ לְהַמְלִיכ֔וֹ וְהַֽחֲצִ֖י אַֽחֲרֵ֥י עָמְרִֽי׃ כב וַיֶּֽחֱזַ֤ק הָעָם֙ אֲשֶׁ֣ר אַֽחֲרֵ֣י עָמְרִ֔י אֶת־הָעָ֕ם אֲשֶׁ֥ר אַֽחֲרֵ֖י תִּבְנִ֣י בֶן־גִּינַ֑ת וַיָּ֣מָת תִּבְנִ֔י וַיִּמְלֹ֖ךְ עָמְרִֽי׃ כג בִּשְׁנַת֩ שְׁלֹשִׁ֨ים וְאַחַ֜ת שָׁנָ֗ה לְאָסָא֙ מֶ֣לֶךְ יְהוּדָ֔ה מָלַ֤ךְ עָמְרִי֙ עַל־יִשְׂרָאֵ֔ל שְׁתֵּ֥ים עֶשְׂרֵ֖ה שָׁנָ֑ה בְּתִרְצָ֖ה מָלַ֥ךְ שֵׁשׁ־שָׁנִֽים׃ כד וַיִּ֜קֶן אֶת־הָהָ֥ר שֹֽׁמְר֛וֹן מֵ֥אֶת שֶׁ֖מֶר בְּכִכְּרַ֣יִם כָּ֑סֶף וַיִּ֨בֶן֙ אֶת־הָהָ֔ר וַיִּקְרָ֗א אֶת־שֵׁ֤ם הָעִיר֙ אֲשֶׁ֣ר בָּנָ֔ה עַ֣ל שֶׁם־שֶׁ֔מֶר אֲדֹנֵ֖י הָהָ֥ר שֹֽׁמְרֽוֹן׃ כה וַיַּֽעֲשֶׂ֥ה עָמְרִ֛י הָרַ֖ע בְּעֵינֵ֣י ה֑' וַיָּ֕רַע מִכֹּ֖ל אֲשֶׁ֥ר לְפָנָֽיו׃ כו וַיֵּ֗לֶךְ בְּכָל־דֶּ֨רֶךְ֙ יָֽרָבְעָ֣ם בֶּן־נְבָ֔ט וּ֨בְחַטָּאת֔וֹ אֲשֶׁ֥ר הֶֽחֱטִ֖יא אֶת־יִשְׂרָאֵ֑ל לְהַכְעִ֗יס אֶת־ה֛' אֱלֹהֵ֥י יִשְׂרָאֵ֖ל בְּהַבְלֵיהֶֽם׃ כז וְיֶ֨תֶר דִּבְרֵ֤י עָמְרִי֙ אֲשֶׁ֣ר עָשָׂ֔ה וּגְבֽוּרָת֖וֹ אֲשֶׁ֣ר עָשָׂ֑ה הֲלֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃ כח וַיִּשְׁכַּ֤ב עָמְרִי֙ עִם־אֲבֹתָ֔יו וַיִּקָּבֵ֖ר בְּשֹֽׁמְר֑וֹן וַיִּמְלֹ֛ךְ אַחְאָ֥ב בְּנ֖וֹ תַּחְתָּֽיו׃
֍ ֍ ֍
(כא) בתחילה היו כל ישראל מאוחדים נגד זמרי, אך אחרי שנהרג זמרי, אָז יֵחָלֵק הָעָם יִשְׂרָאֵל לַחֵצִי – לשני חצאים, חֲצִי הָעָם הָיָה אַחֲרֵי תִבְנִי בֶן גִּינַת, לְהַמְלִיכוֹ, וְהַחֲצִי אַחֲרֵי עָמְרִי שר הצבא.
(כב) וַיֶּחֱזַק הָעָם אֲשֶׁר אַחֲרֵי עָמְרִי, אֶת הָעָם אֲשֶׁר אַחֲרֵי תִּבְנִי בֶן גִּינַת, וַיָּמָת תִּבְנִי, וַיִּמְלֹךְ עָמְרִי על ישראל.
(כג) לאחר שהומלך עמרי במחנה [בשנת עשרים ושבע לאסא מלך יהודה], מלך חמש שנים מלכות חלקית, כיון שהיה עדיין במלחמה עם תבני, ולאחר אותם חמש שנים היתה מלכותו שלמה על כל ישראל, והיה זה בִּשְׁנַת שְׁלֹשִׁים וְאַחַת שָׁנָה לְאָסָא מֶלֶךְ יְהוּדָה, ובסך הכל מָלַךְ עָמְרִי עַל יִשְׂרָאֵל שְׁתֵּים עֶשְׂרֵה שָׁנָה, חמש שנים במחלוקת עם תבני ושבע שנים לבדו, ומתוך אותם שנים, בְּתִרְצָה מָלַךְ שֵׁשׁ שָׁנִים ראשונות של מלכותו.
(כד) וַיִּקֶן אֶת הָהָר שֹׁמְרוֹן מֵאֶת שֶׁמֶר בְּכִכְּרַיִם כָּסֶף, וַיִּבֶן אֶת הָהָר להיות לעיר מלכותו, וַיִּקְרָא אֶת שֵׁם הָעִיר אֲשֶׁר בָּנָה עַל שֶׁם שֶׁמֶר, אֲדֹנֵי הָהָר שֹׁמְרוֹן [ורומז הנביא על ההבדל בין ירושלים בירת ממלכת יהודה, הקרויה על שם 'יראה' ו'שלימות', לעומת שומרון בירת ממלכת ישראל, הקרויה על שם אדם בליעל].
(כה) וַיַּעֲשֶׂה עָמְרִי הָרַע בְּעֵינֵי ה', וַיָּרַע את מעשיו יותר מִכֹּל אֲשֶׁר מלכו לְפָנָיו, בכך שהוסיף לעבוד עבודות זרות שלא היו שם קודם לכן.
(כו) ומלבד העבירות החדשות שהוסיף, וַיֵּלֶךְ גם בְּכָל דֶּרֶךְ יָרָבְעָם בֶּן נְבָט, וּבְחַטָּאתוֹ אֲשֶׁר הֶחֱטִיא אֶת יִשְׂרָאֵל, לְהַכְעִיס אֶת ה' אֱלֹהֵי יִשְׂרָאֵל בְּהַבְלֵיהֶם.
(כז) וְיֶתֶר דִּבְרֵי עָמְרִי אֲשֶׁר עָשָׂה, וּגְבוּרָתוֹ אֲשֶׁר עָשָׂה, הֲלֹא הֵם כְּתוּבִים עַל סֵפֶר דִּבְרֵי הַיָּמִים לְמַלְכֵי יִשְׂרָאֵל.
(כח) וַיִּשְׁכַּב עָמְרִי עִם אֲבֹתָיו, וַיִּקָּבֵר בְּשֹׁמְרוֹן, וַיִּמְלֹךְ אַחְאָב בְּנוֹ תַּחְתָּיו.
