שיעור 27, ספר נחמיה, פרק ז, סח-עב
סח גְּמַלִּ֕ים אַרְבַּ֥ע מֵא֖וֹת שְׁלֹשִׁ֣ים וַֽחֲמִשָּׁ֑ה חֲמֹרִ֕ים שֵׁ֣שֶׁת אֲלָפִ֔ים שְׁבַ֥ע מֵא֖וֹת וְעֶשְׂרִֽים׃ סט וּמִקְצָת֙ רָאשֵׁ֣י הָֽאָב֔וֹת נָֽתְנ֖וּ לַמְּלָאכָ֑ה הַתִּרְשָׁ֜תָא נָתַ֣ן לָֽאוֹצָ֗ר זָהָ֞ב דַּרְכְּמֹנִ֥ים אֶ֨לֶף֙ מִזְרָק֣וֹת חֲמִשִּׁ֔ים כָּתְנוֹת֙ כֹּֽהֲנִ֔ים שְׁלֹשִׁ֖ים וַֽחֲמֵ֥שׁ מֵאֽוֹת׃ ע וּמֵֽרָאשֵׁ֣י הָֽאָב֗וֹת נָֽתְנוּ֙ לְאוֹצַ֣ר הַמְּלָאכָ֔ה זָהָ֕ב דַּרְכְּמוֹנִ֖ים שְׁתֵּ֣י רִבּ֑וֹת וְכֶ֕סֶף מָנִ֖ים אַלְפַּ֥יִם וּמָאתָֽיִם׃ עא וַֽאֲשֶׁ֣ר נָֽתְנוּ֮ שְׁאֵרִ֣ית הָעָם֒ זָהָ֗ב דַּרְכְּמֹנִים֙ שְׁתֵּ֣י רִבּ֔וֹא וְכֶ֖סֶף מָנִ֣ים אַלְפָּ֑יִם וְכָתְנֹ֥ת כֹּֽהֲנִ֖ים שִׁשִּׁ֥ים וְשִׁבְעָֽה׃ עב וַיֵּֽשְׁב֣וּ הַכֹּֽהֲנִ֣ים וְהַלְוִיִּ֡ם וְהַשּֽׁוֹעֲרִים֩ וְהַמְשֹֽׁרְרִ֨ים וּמִן־הָעָ֧ם וְהַנְּתִינִ֛ים וְכָל־יִשְׂרָאֵ֖ל בְּעָֽרֵיהֶ֑ם וַיִּגַּע֙ הַחֹ֣דֶשׁ הַשְּׁבִיעִ֔י וּבְנֵ֥י יִשְׂרָאֵ֖ל בְּעָֽרֵיהֶֽם׃
֍ ֍ ֍
(סח) והיו עמהם גְּמַלִּים אַרְבַּע מֵאוֹת שְׁלֹשִׁים וַחֲמִשָּׁה, חֲמֹרִים שֵׁשֶׁת אֲלָפִים שְׁבַע מֵאוֹת וְעֶשְׂרִים.
(סט) וּמִקְצָת רָאשֵׁי הָאָבוֹת נָתְנוּ תרומה לַמְּלָאכָה, הַתִּרְשָׁתָא [-נחמיה] נָתַן לָאוֹצָר זָהָב דַּרְכְּמֹנִים [-שם מטבע] אֶלֶף, מִזְרָקוֹת חֲמִשִּׁים, כָּתְנוֹת כֹּהֲנִים שְׁלֹשִׁים וַחֲמֵשׁ מֵאוֹת.
(ע) וּמֵרָאשֵׁי הָאָבוֹת נָתְנוּ לְאוֹצַר הַמְּלָאכָה, זָהָב דַּרְכְּמוֹנִים שְׁתֵּי רִבּוֹת [-עשרים אלף], וְכֶסֶף מָנִים אַלְפַּיִם וּמָאתָיִם.
(עא) וַאֲשֶׁר נָתְנוּ שְׁאֵרִית הָעָם, זָהָב דַּרְכְּמֹנִים שְׁתֵּי רִבּוֹא, וְכֶסֶף מָנִים אַלְפָּיִם, וְכָתְנֹת כֹּהֲנִים שִׁשִּׁים וְשִׁבְעָה.
(עב) וַיֵּשְׁבוּ הַכֹּהֲנִים וְהַלְוִיִּם וְהַשּׁוֹעֲרִים וְהַמְשֹׁרְרִים, וּמִן הָעָם [-מבני יהודה ובנימין], וְהַנְּתִינִים, וְכָל יִשְׂרָאֵל [-משאר שבטי ישראל] בְּעָרֵיהֶם, וַיִּגַּע הַחֹדֶשׁ הַשְּׁבִיעִי, הוא חודש תשרי, וּבְנֵי יִשְׂרָאֵל בְּעָרֵיהֶם.
