שיעור 32. ספר יהושע, פרק יב, א-כד

א וְאֵ֣לֶּה ׀ מַלְכֵ֣י הָאָ֗רֶץ אֲשֶׁ֨ר הִכּ֤וּ בְנֵֽי־יִשְׂרָאֵל֙ וַיִּֽרְשׁ֣וּ אֶת־אַרְצָ֔ם בְּעֵ֥בֶר הַיַּרְדֵּ֖ן מִזְרְחָ֣ה הַשָּׁ֑מֶשׁ מִנַּ֤חַל אַרְנוֹן֙ עַד־הַ֣ר חֶרְמ֔וֹן וְכָל־הָֽעֲרָבָ֖ה מִזְרָֽחָה׃ ב סִיחוֹן֙ מֶ֣לֶךְ הָֽאֱמֹרִ֔י הַיּוֹשֵׁ֖ב בְּחֶשְׁבּ֑וֹן מֹשֵׁ֡ל מֵֽעֲרוֹעֵ֡ר אֲשֶׁר֩ עַל־שְׂפַת־נַ֨חַל אַרְנ֜וֹן וְת֤וֹךְ הַנַּ֨חַל֙ וַֽחֲצִ֣י הַגִּלְעָ֔ד וְעַד֙ יַבֹּ֣ק הַנַּ֔חַל גְּב֖וּל בְּנֵ֥י עַמּֽוֹן׃ ג וְהָֽעֲרָבָה֩ עַד־יָ֨ם כִּנְר֜וֹת מִזְרָ֗חָה וְ֠עַד יָ֣ם הָֽעֲרָבָ֤ה יָם־הַמֶּ֨לַח֙ מִזְרָ֔חָה דֶּ֖רֶךְ בֵּ֣ית הַיְשִׁמ֑וֹת וּמִ֨תֵּימָ֔ן תַּ֖חַת אַשְׁדּ֥וֹת הַפִּסְגָּֽה׃ ד וּגְב֗וּל ע֚וֹג מֶ֣לֶךְ הַבָּשָׁ֔ן מִיֶּ֖תֶר הָֽרְפָאִ֑ים הַיּוֹשֵׁ֥ב בְּעַשְׁתָּר֖וֹת וּבְאֶדְרֶֽעִי׃ ה וּ֠מֹשֵׁל בְּהַ֨ר חֶרְמ֤וֹן וּבְסַלְכָה֙ וּבְכָל־הַבָּשָׁ֔ן עַד־גְּב֥וּל הַגְּשׁוּרִ֖י וְהַמַּֽעֲכָתִ֑י וַֽחֲצִי֙ הַגִּלְעָ֔ד גְּב֖וּל סִיח֥וֹן מֶֽלֶךְ־חֶשְׁבּֽוֹן׃ ו מֹשֶׁ֧ה עֶֽבֶד־ה֛' וּבְנֵ֥י יִשְׂרָאֵ֖ל הִכּ֑וּם וַֽ֠יִּתְּנָהּ מֹשֶׁ֨ה עֶֽבֶד־ה֜' יְרֻשָּׁ֗ה לָרֽאוּבֵנִי֙ וְלַגָּדִ֔י וְלַֽחֲצִ֖י שֵׁ֥בֶט הַֽמְנַשֶּֽׁה׃ ז וְאֵ֣לֶּה מַלְכֵ֣י הָאָ֡רֶץ אֲשֶׁר֩ הִכָּ֨ה יְהוֹשֻׁ֜עַ וּבְנֵ֣י יִשְׂרָאֵ֗ל בְּעֵ֤בֶר הַיַּרְדֵּן֙ יָ֔מָּה מִבַּ֤עַל גָּד֙ בְּבִקְעַ֣ת הַלְּבָנ֔וֹן וְעַד־הָהָ֥ר הֶֽחָלָ֖ק הָֽעֹלֶ֣ה שֵׂעִ֑ירָה וַיִּתְּנָ֨הּ יְהוֹשֻׁ֜עַ לְשִׁבְטֵ֧י יִשְׂרָאֵ֛ל יְרֻשָּׁ֖ה כְּמַחְלְקֹתָֽם׃ ח בָּהָ֣ר וּבַשְּׁפֵלָ֗ה וּבָֽעֲרָבָה֙ וּבָ֣אֲשֵׁד֔וֹת וּבַמִּדְבָּ֖ר וּבַנֶּ֑גֶב הַֽחִתִּי֙ הָֽאֱמֹרִ֔י וְהַֽכְּנַעֲנִי֙ הַפְּרִזִּ֔י הַֽחִוִּ֖י וְהַיְבוּסִֽי׃ ט מֶ֥לֶךְ יְרִיח֖וֹ אֶחָ֑ד מֶ֧לֶךְ הָעַ֛י אֲשֶׁר־מִצַּ֥ד בֵּֽית־אֵ֖ל אֶחָֽד׃ י מֶ֤לֶךְ יְרֽוּשָׁלִַ֨ם֙ אֶחָ֔ד מֶ֥לֶךְ חֶבְר֖וֹן אֶחָֽד׃ יא מֶ֤לֶךְ יַרְמוּת֙ אֶחָ֔ד מֶ֥לֶךְ לָכִ֖ישׁ אֶחָֽד׃ יב מֶ֤לֶךְ עֶגְלוֹן֙ אֶחָ֔ד מֶ֥לֶךְ גֶּ֖זֶר אֶחָֽד׃ יג מֶ֤לֶךְ דְּבִר֙ אֶחָ֔ד מֶ֥לֶךְ גֶּ֖דֶר אֶחָֽד׃ יד מֶ֤לֶךְ חָרְמָה֙ אֶחָ֔ד מֶ֥לֶךְ עֲרָ֖ד אֶחָֽד׃ טו מֶ֤לֶךְ לִבְנָה֙ אֶחָ֔ד מֶ֥לֶךְ עֲדֻלָּ֖ם אֶחָֽד׃ טז מֶ֤לֶךְ מַקֵּדָה֙ אֶחָ֔ד מֶ֥לֶךְ בֵּֽית־אֵ֖ל אֶחָֽד׃ יז מֶ֤לֶךְ תַּפּ֨וּחַ֙ אֶחָ֔ד מֶ֥לֶךְ חֵ֖פֶר אֶחָֽד׃ יח מֶ֤לֶךְ אֲפֵק֙ אֶחָ֔ד מֶ֥לֶךְ לַשָּׁר֖וֹן אֶחָֽד׃ יט מֶ֤לֶךְ מָדוֹן֙ אֶחָ֔ד מֶ֥לֶךְ חָצ֖וֹר אֶחָֽד׃ כ מֶ֣לֶךְ שִׁמְר֤וֹן מְרֹאון֙ אֶחָ֔ד מֶ֥לֶךְ אַכְשָׁ֖ף אֶחָֽד׃ כא מֶ֤לֶךְ תַּעְנַךְ֙ אֶחָ֔ד מֶ֥לֶךְ מְגִדּ֖וֹ אֶחָֽד׃ כב מֶ֤לֶךְ קֶ֨דֶשׁ֙ אֶחָ֔ד מֶֽלֶךְ־יָקְנְעָ֥ם לַכַּרְמֶ֖ל אֶחָֽד׃ כג מֶ֥לֶךְ דּ֛וֹר לְנָפַ֥ת דּ֖וֹר אֶחָ֑ד מֶֽלֶךְ־גּוֹיִ֥ם לְגִלְגָּ֖ל אֶחָֽד׃ כד מֶ֥לֶךְ תִּרְצָ֖ה אֶחָ֑ד כָּל־מְלָכִ֖ים שְׁלֹשִׁ֥ים וְאֶחָֽד׃

– – – – –

(א) וְאֵלֶּה ׀ מַלְכֵי הָאָרֶץ אֲשֶׁר הִכּוּ בְנֵי יִשְׂרָאֵל וַיִּרְשׁוּ אֶת אַרְצָם, וכלולים בזה גם הכיבושים של משה רבינו, בְּעֵבֶר הַיַּרְדֵּן מִזְרְחָה הַשָּׁמֶשׁ, כבשו מִנַּחַל אַרְנוֹן עַד הַר חֶרְמוֹן, וְכָל הָעֲרָבָה מִזְרָחָה:

(ב) סִיחוֹן מֶלֶךְ הָאֱמֹרִי הַיּוֹשֵׁב בְּחֶשְׁבּוֹן, שהיה מֹשֵׁל מֵעֲרוֹעֵר אֲשֶׁר עַל שְׂפַת נַחַל אַרְנוֹן, וְתוֹךְ הַנַּחַל, וַחֲצִי הַגִּלְעָד, וְעַד יַבֹּק הַנַּחַל גְּבוּל בְּנֵי עַמּוֹן:

(ג) ממשיך הכתוב ומפרט את ממלכת סיחון, וְהָעֲרָבָה – המישור עַד יָם כִּנְרוֹת מִזְרָחָה, וְעַד יָם הָעֲרָבָה יָם הַמֶּלַח מִזְרָחָה, דֶּרֶךְ בֵּית הַיְשִׁמוֹת, וּמִתֵּימָן – מצד דרום תַּחַת אַשְׁדּוֹת הַפִּסְגָּה:

(ד) וּגְבוּל ע֚וֹג מֶלֶךְ הַבָּשָׁן, גם אותו כבשו בני ישראל, והוא היה מִיֶּתֶר הָרְפָאִים, הַיּוֹשֵׁב בְּעַשְׁתָּרוֹת וּבְאֶדְרֶעִי:

(ה) וּמֹשֵׁל בְּהַר חֶרְמוֹן, וּבְסַלְכָה, וּבְכָל הַבָּשָׁן, עַד גְּבוּל הַגְּשׁוּרִי וְהַמַּעֲכָתִי, וַחֲצִי הַגִּלְעָד ששם היה גְּבוּל סִיחוֹן מֶלֶךְ חֶשְׁבּוֹן, כי חצי מהגלעד היה של סיחון, וחציו של עוג.

(ו) מֹשֶׁה עֶבֶד ה' וּבְנֵי יִשְׂרָאֵל הִכּוּם – את סיחון ועוג, וַיִּתְּנָהּ מֹשֶׁה עֶבֶד ה', בציווי ה', יְרֻשָּׁה לָראוּבֵנִי וְלַגָּדִי וְלַחֲצִי שֵׁבֶט הַמְנַשֶּׁה׃

(ז) עתה מפרש הכתוב את הכיבושים של יהושע בן נון (וכאן לא פירט את כל הארץ, אלא רק את מה שכבש יהושע בחייו, כי גם לאחר מותו עדיין נשאר חלק גדול מהארץ שלא נכבש, וכמו שיבואר להלן), וְאֵלֶּה מַלְכֵי הָאָרֶץ אֲשֶׁר הִכָּה יְהוֹשֻׁעַ וּבְנֵי יִשְׂרָאֵל, בְּעֵבֶר הַיַּרְדֵּן יָמָּה – בצידו המערבי של הירדן, מִבַּעַל גָּד בְּבִקְעַת הַלְּבָנוֹן, וְעַד הָהָר הֶחָלָק הָעֹלֶה שֵׂעִירָה, וַיִּתְּנָהּ יְהוֹשֻׁעַ לְשִׁבְטֵי יִשְׂרָאֵל יְרֻשָּׁה כְּמַחְלְקֹתָם:

(ח) בָּהָר, וּבַשְּׁפֵלָה, וּבָעֲרָבָה, וּבָאֲשֵׁדוֹת, וּבַמִּדְבָּר, וּבַנֶּגֶב, הַחִתִּי הָאֱמֹרִי וְהַכְּנַעֲנִי הַפְּרִזִּי הַחִוִּי וְהַיְבוּסִי׃

ט ועתה מונה הכתוב את המלכים שהרג יהושע במלחמה, הגם שיש מהם שלא נכבשה ארצם עדיין, אלא אחרי מות יהושע. מֶלֶךְ יְרִיחוֹ אֶחָד, מֶלֶךְ הָעַי אֲשֶׁר מִצַּד בֵּית אֵל אֶחָד:

(י) מֶלֶךְ יְרוּשָׁלַם אֶחָד, מֶלֶךְ חֶבְרוֹן אֶחָד׃

(יא) מֶלֶךְ יַרְמוּת אֶחָד, מֶלֶךְ לָכִישׁ אֶחָד׃

(יב) מֶלֶךְ עֶגְלוֹן אֶחָד, מֶלֶךְ גֶּזֶר אֶחָד׃

(יג) מֶלֶךְ דְּבִר אֶחָד, מֶלֶךְ גֶּדֶר אֶחָד׃

(יד) מֶלֶךְ חָרְמָה אֶחָד, מֶלֶךְ עֲרָד אֶחָד׃

(טו) מֶלֶךְ לִבְנָה אֶחָד, מֶלֶךְ עֲדֻלָּם אֶחָד׃

(טז) מֶלֶךְ מַקֵּדָה אֶחָד, מֶלֶךְ בֵּית אֵל אֶחָד׃

(יז) מֶלֶךְ תַּפּוּחַ אֶחָד, מֶלֶךְ חֵפֶר אֶחָד׃

(יח) מֶלֶךְ אֲפֵק אֶחָד, מֶלֶךְ לַשָּׁרוֹן אֶחָד׃

(יט) מֶלֶךְ מָדוֹן אֶחָד, מֶלֶךְ חָצוֹר אֶחָד:

(כ) מֶלֶךְ שִׁמְרוֹן מְרֹאון אֶחָד, מֶלֶךְ אַכְשָׁף אֶחָד׃

(כא) מֶלֶךְ תַּעְנַךְ אֶחָד, מֶלֶךְ מְגִדּוֹ אֶחָד׃

(כב) מֶלֶךְ קֶדֶשׁ אֶחָד, מֶלֶךְ יָקְנְעָם לַכַּרְמֶל אֶחָד (ו'יקנעם' היתה עיר המלוכה, וסמוכה לכרמל).

(כג) מֶלֶךְ דּוֹר הסמוכה לְנָפַת (-למחוז) דּוֹר אֶחָד, מֶלֶךְ גּוֹיִם הסמוך לְגִלְגָּל אֶחָד׃

(כד) מֶלֶךְ תִּרְצָה אֶחָד. כָּל המְלָכִים שהרג יהושע בן נון, שְׁלֹשִׁים וְאֶחָד׃