ט וַיִּתֵּן֩ אֱלֹהִ֨ים חָכְמָ֧ה לִשְׁלֹמֹ֛ה וּתְבוּנָ֖ה הַרְבֵּ֣ה מְאֹ֑ד וְרֹ֣חַב לֵ֔ב כַּח֕וֹל אֲשֶׁ֖ר עַל־שְׂפַ֥ת הַיָּֽם׃ י וַתֵּ֨רֶב֙ חָכְמַ֣ת שְׁלֹמֹ֔ה מֵֽחָכְמַ֖ת כָּל־בְּנֵי־קֶ֑דֶם וּמִכֹּ֖ל חָכְמַ֥ת מִצְרָֽיִם׃ יא וַיֶּחְכַּם֮ מִכָּל־הָֽאָדָם֒ מֵֽאֵיתָ֣ן הָֽאֶזְרָחִ֗י וְהֵימָ֧ן וְכַלְכֹּ֛ל וְדַרְדַּ֖ע בְּנֵ֣י מָח֑וֹל וַיְהִֽי־שְׁמ֥וֹ בְכָֽל־הַגּוֹיִ֖ם סָבִֽיב׃ יב וַיְדַבֵּ֕ר שְׁלֹ֥שֶׁת אֲלָפִ֖ים מָשָׁ֑ל וַיְהִ֥י שִׁיר֖וֹ חֲמִשָּׁ֥ה וָאָֽלֶף׃ יג וַיְדַבֵּר֮ עַל־הָֽעֵצִים֒ מִן־הָאֶ֨רֶז֙ אֲשֶׁ֣ר בַּלְּבָנ֔וֹן וְעַד֙ הָֽאֵז֔וֹב אֲשֶׁ֥ר יֹצֵ֖א בַּקִּ֑יר וַיְדַבֵּר֙ עַל־הַבְּהֵמָ֣ה וְעַל־הָע֔וֹף וְעַל־הָרֶ֖מֶשׂ וְעַל־הַדָּגִֽים׃ יד וַיָּבֹ֨אוּ֙ מִכָּל־הָ֣עַמִּ֔ים לִשְׁמֹ֕עַ אֵ֖ת חָכְמַ֣ת שְׁלֹמֹ֑ה מֵאֵת֙ כָּל־מַלְכֵ֣י הָאָ֔רֶץ אֲשֶׁ֥ר שָֽׁמְע֖וּ אֶת־חָכְמָתֽוֹ׃
֍ ֍ ֍
(ט) מלבד החכמה שנתן ה' לשלמה לענין הנהגת העם ושפיטתו, וַיִּתֵּן אֱלֹהִים חָכְמָה לִשְׁלֹמֹה וּתְבוּנָה הַרְבֵּה מְאֹד, וְרֹחַב לֵב להבין את כל פרטי החכמות, כַּחוֹל אֲשֶׁר עַל שְׂפַת הַיָּם.
(י) וַתֵּרֶב חָכְמַת שְׁלֹמֹה מֵחָכְמַת כָּל בְּנֵי קֶדֶם, שהיו בקיאים בחכמת מערכת הכוכבים וכדור העולם, וּמִכֹּל חָכְמַת מִצְרָיִם, שהיו בקיאים בחכמת הטבע.
(יא) וַיֶּחְכַּם מִכָּל הָאָדָם – מכל החכמים שהיו בתקופתו, מֵאֵיתָן הָאֶזְרָחִי, וְהֵימָן, וְכַלְכֹּל, וְדַרְדַּע, בְּנֵי מָחוֹל, שהיו חכמים גדולים מפורסמים בזמנו, וַיְהִי שְׁמוֹ בְכָל הַגּוֹיִם סָבִיב.
(יב) ומלבד החכמה והתבונה הקבועים בליבו, וַיְדַבֵּר שלמה ברוח הקודש שְׁלֹשֶׁת אֲלָפִים מָשָׁל – ספר משלי, המחולק לשלשה חלקים, [ו'אלפים' הוא לשון לימוד, כמו 'וַאֲאַלֶּפְךָ חָכְמָה'], וַיְהִי שִׁירוֹ – וכן חיבר את מגילת שיר השירים, חֲמִשָּׁה וָאָלֶף – המחולקת לחמשה שירים, והשיר האחרון הפותח בפסוק 'אָחוֹת לָנוּ קְטַנָּה' נקרא 'שיר האלף' כיון שמוזכר בו הפסוק 'הָאֶלֶף לְךָ שְׁלֹמֹה'.
(יג) וכן חיבר שלמה חיבורים רבים בחכמת הטבע, וַיְדַבֵּר עַל הָעֵצִים – סידר בספרים אלו את חכמת הצומח על כל מיניו, מִן הָאֶרֶז אֲשֶׁר בַּלְּבָנוֹן וְעַד הָאֵזוֹב אֲשֶׁר יֹצֵא בַּקִּיר. וכן חיבר ספרים בענין חכמת וסדר מיני בעלי החיים, לפי עניינם, וַיְדַבֵּר בספרים אלו עַל הַבְּהֵמָה וְעַל הָעוֹף וְעַל הָרֶמֶשׂ וְעַל הַדָּגִים.
(יד) וַיָּבֹאוּ מִכָּל הָעַמִּים לִשְׁמֹעַ אֵת חָכְמַת שְׁלֹמֹה, ונשלחו לשם כך שליחים מֵאֵת כָּל מַלְכֵי הָאָרֶץ, אֲשֶׁר שָׁמְעוּ אֶת חָכְמָתוֹ.
